Síminn og Rafíþróttasamband Íslands taka höndum saman og ætla sér að breyta landslagi rafíþrótta á Íslandi í sameiningu.
Þetta kemur fram í tilkynningu frá Símanum og Rafíþróttasambandi Íslands.
Rafíþróttasambandið mun nýta sér sjónvarpsdreifikerfi Símans til að koma dagskrárgerð sinni beint heim í stofu eða í snjalltæki áhugafólks um rafíþróttir.
Síminn mun styðja við markaðssetningu og kynningarstarfsemi Rafíþróttarsambandsins og þar með auðvelda aðgengi að rafíþróttum.
Haft er eftir Jökli Jóhannssyni, framkvæmdastjóra Rafíþróttasambandsins og fyrrum atvinnumanni í rafíþróttum, að í haust fer í loftið stærri sjónvarpsdagskrá sem inniheldur meðal annars Skák, sem mun fela í sér útsláttarkeppni í hraðskák og Fortnite sem er í miklum vexti á Íslandi.
Að sögn Birkis Ágústssonar, dagskrárstjóra innlendrar dagskrárgerðar hjá Símanum, eru rafíþróttir stór og mikilvægur hluti af íþrótta- og tómstundalífi Íslendinga og útsendingar frá þeim séu ekki bara vinsælt sjónvarpsefni heldur líka frábær afþreying.