Kolbrún segir BDFC frábæran möguleika

Kolbrún Baldursdóttir oddviti Flokks fólksins í Reykjavík.
Kolbrún Baldursdóttir oddviti Flokks fólksins í Reykjavík. mbl.is/Eggert Jóhannesson

„Við Einar [Þorsteinsson] höfum aldrei hist. Við höfum talað saman óformlega í síma,“ segir Kolbrún Baldursdóttir oddviti Flokks fólksins í Reykjavík um samskipti sín við oddvita Framsóknar. 

Einar Þorsteinsson sagði í samtali við mbl.is að hann hafi heyrt í öllum oddvitum sem fengu kjörna fulltrúa í borgarstjórn Reykjavíkur í gær en gera má ráð fyrir að einhver af samtölunum hafi einungis farið fram símleiðis. 

Kolbrún segir að henni finnst möguleikinn á samstarfi Framsóknar, Sjálfstæðisflokks, Flokks fólksins og Viðreisnar frábær. 

Þráir að fá að vinna á biðlistunum

Spurð hvaða vinnu hún myndi helst vilja koma að í slíku samstarfi segir Kolbrún: „Það er alveg ljóst að ég þrái að komast að velferðarmálunum. Ég er auðvitað menntaður sálfræðingur til þrjátíu og eitthvað ára, búin að vinna í þessum geira og er þrælkunnug honum og þrái að komast í það að getað tekið á þessum biðlistum – þó að ég viti að það gerist ekki á einni nóttu.“

Hún segir flokkana sem um ræðir eiga margt sameiginlegt: „Sjálfstæðisflokkurinn hefur talað fyrir leikskólamálunum og Einar hefur talað fyrir að sinna börnum og barnafjölskyldum þannig að ég óttast ekki að það verði einhver ágreiningur um það.“

mbl.is