Evrópusambandið hefur veitt fimm milljóna evra styrk eða ríflega 600 milljónir króna til nýs sam-evrópsk þróunarverkefnis um lífmassaframleiðslu og aðra úrvinnslu lúpínu sem Nýsköpunarmiðstöð Íslands stýrir.
Verkefnið hefur fengið lafnið LIBBIO og að því koma fjórtán aðilar í átta löndum, þar á meðal Landgræðsla ríkisins.
Í fréttatilkynningu segir að Evrópusambandið hafi sett sér það markmið að draga úr vægi jarðolíu í hagkerfinu og vera betur sjálfu sér nægt um lífafurðir. Með LIBBIO-verkefninu vill Evrópusambandið auka lífmassaframleiðslu af rýru landi og styrkja þar með lífhagkerfið án þess að nota verðmætt ræktarland. Á Íslandi er mikið af mjög rýru landi og hér hefur Alaskalúpínan dafnað um árabil.
Í LIBBIO-verkefninu verður skoðað hvernig vinna má olíu, prótein og fóður úr lúpínunni eða nota hana til orkuframleiðslu. Hlutverk Nýsköpunarmiðstöðvar er próteinvinnsla til annarra nota en matvæla og orkuvinnsla, auk verkefnisstjórnunar. Á Íslandi verður áhersla lögð á að kanna möguleika lúpínunnar til vaxtar á rýru landi með það fyrir augum að nýta hana til uppgræðslu eða fóðurframleiðslu. Verkefnið er styrkt af samstarfsneti evrópska lífmassaiðnaðarins, innan H2020 rannsóknaráætlunar Evrópusambandsins, samkvæmt verkefnissamningi nr. 720726.