EVE Online er „kannski áhugaverðastur og trylltastur“ allra þeirra tölvuleikja sem spilurum stendur til boða þessa stundina til að stytta sér stundir í kórónuveirufaraldrinum. Það er að minnsta kosti mat blaðamanns New York Times sem hefur tekið saman ítarlegan lista yfir tölvuleiki sem geta létt spilurum lífið á þessum fordæmalausu tímum.
Í greininni leiðir Seth Schiesel, sem sérhæfir sig í tölvuleikjaskrifum, lesendur sem hafa fengið sig fullsadda á bókalestri, sjónvarpsglápi og gömlum borðspilum inn í heim tölvuleikjanna. Af nægu er að taka og fer Schiesel yfir ótal leiðir til að spila tölvuleiki, allt frá í síma yfir í borðtölvu, og þar er fjölspilunarleikinn EVE Online kynntur til sögunnar og sagður áhugaverðastur þeirra allra.
„Ef þú elskar töflureikni (e. spreadsheets) og vilt umbreyta þeim áhuga í vald ásamt mörg þúsund öðrum gallhörðum spilurum sem hafa barist um yfirráð í sömu sýndarvetrarbrautinni síðan 2003, þá er þessi leikur fyrir þig,“ segir í umfjöllun NYT.
Þar segir að það taki vissulega tíma að komast upp á lagið með að spila leikinn. „En ef þú vilt bara fljúga um í geimskipi og segja „pjú pjú“ á meðan þú skýtur leysigeislum út um allt er það í góðu lagi líka,“ segir jafnframt.
Hilmar Veigar Pétursson, framkvæmdastjóri tölvuleikjafyrirtækisins CCP, sem þróaði EVE Online frá upphafi, sagði í samtali við mbl.is fyrr í vikunni að áhrif kórónuveirufaraldursins sé að merkja hjá fyrirtækinu og lýsir sér fyrst og fremst í notendafjölda.
„Helgin hjá okkur núna var algjört met, 10.000 manns eru að skrá sig fyrir nýjum reikningi á dag,“ sagði Hilmar, sem er rúm þreföldun á daglegum nýskráningum miðað við sama tíma í fyrra.
Þá eru margir gamlir notendur að snúa til baka til að endurnýja kynnin við aðra spilara. „Við sjáum marga notendur koma til baka núna, til dæmis til þess að spjalla við aðra notendur gegnum spjallmöguleikann á EVE,“ sagði Hilmar Veigar og bætti því við að tölvuleikurinn sé nánast lækning á þeim einmanaleika og einangrun sem heimsbyggðin nú glími við.