Veisludrottningin gefur út bók fyrir jólin

Ljósmynd/Berglind Hreiðarsdóttir

Þau stórkostlegu tíðindi berast að hin eina sanna Berglind Hreiðarsdóttir, sem ætti að vera lesendum Matarvefsins á mbl.is að góðu kunn, er að gefa út sína fyrstu bók fyrir jólin. Bókin er væntanleg í nóvember og verður farið rækilega yfir það í henni hvernig halda á veislur af ýmsum toga á sem snjallastan og hagkvæmastan hátt.

Fáir eru flinkari í veisluhaldi en Berglind og því verður bókin að teljast mikill hvalreki fyrir alla þá sem þurfa að ferma, útskrifa eða bjóða fólki í afmæli á komandi misserum.

Hér gefur að líta eitt af meistarastykkjum Berglindar, en þetta er gulrótarkaka með guðdómlegu rjómaostakremi.

Gulrótarkaka með rjómaostskremi

  • 290 g hveiti
  • 2 tsk. lyftiduft
  • ½ tsk. matarsódi
  • 1 tsk. salt
  • 2 tsk. kanill
  • ½ tsk. múskat
  • ¼ tsk. negull
  • 300 ml matarolía
  • 220 g púðursykur
  • 220 g sykur
  • 4 egg
  • 2 tsk. vanilludropar
  • 260 g rifnar gulrætur

Aðferð:

  1. Hitið ofninn 175°C og gerið 3x15 cm kökuform tilbúin.
  2. Setjið hveiti, lyftiduft, matarsóda, salt, kanil, múskat og negul í skál og leggið til hliðar.
  3. Hrærið saman matarolíu og púðursykri í hrærivélarskálinni og bætið síðan eggjunum saman við, einu í einu og skafið vel niður á milli.
  4. Hellið þá vanilludropunum út í skálina og síðan þurrefnunum í nokkrum skömmtum.
  5. Að lokum fara rifnar gulrætur út í, ég notaði fínt rifjárn en ef þið viljið grófari áferð má rífa þær gróft.
  6. Klippið bökunarpappír í botninn á formunum og spreyið þau vel með matarolíuspreyi.
  7. Skiptið deiginu jafnt niður á milli formanna (ég vigtaði um 515-520 g í hvert).
  8. Bakið í um 50 mínútur, eða þar til prjónn kemur út með smá kökumylsnu á en ekki blautu deigi.

Rjómaostskrem

  • 135 g smjör við stofuhita
  • 200 g rjómaostur við stofuhita
  • 750 g flórsykur
  • 4 tsk. vanilludropar

Aðferð:

  1. Þeytið saman smjör og rjómaost þar til það er létt og ljóst.
  2. Bætið flórsykri saman við í nokkrum skömmtum, skafið niður á milli og hrærið vel.
  3. Að lokum fara vanilludroparnir saman við.
  4. Kreminu er smurt á milli botna og kakan hjúpuð að utan. Hafið kremhjúpinn þykkan á toppnum en skafið hann vel af á hliðunum svo það sjáist í botnana.
  5. Skreytið með ferskum blómum/haustblómum að vild.
Ljósmynd/Berglind Hreiðarsdóttir
Ljósmynd/Berglind Hreiðarsdóttir
Berglind Hreiðarsdóttir
Berglind Hreiðarsdóttir Haraldur Jónasson/Hari
Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.790 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »