Þessi uppskrift er þess eðlis að þið verðið að prófa. Hér erum við með tilbrigði við kunnuglegt jólastef í einstaklega fallegri útfærslu Helgu Maríu sem heldur úti bloggsíðunni Veganistur ásamt systur sinn, Júlíu Sif.
Mjúk piparkaka
- 200 gr Naturli-smjörlíki við stofuhita
- 2 dl sykur
- 6 dl hveiti
- 2 tsk. lyftiduft
- 1,5 tsk. matarsódi
- 1 msk. kanill
- 2 tsk. engiferkrydd
- 2 tsk. negull
- örlítið salt
- 6 dl vegan mjólk
- 2 tsk. vanilludropar
- 1 msk. eplaedik
- 2 msk. týtuberjasulta (lingonsylt).*
*Þessa sultu er kannski svolítið erfitt að finna á Íslandi. Hún er alltaf notuð í svona köku í Svíþjóð og mér þykir gott að hafa hana með. Ég veit að hún fæst í IKEA, en fyrir ykkur sem ekki nennið eða hafið tök á að fara þangað eftir henni mæli ég með að prufa að nota aðra sultu í staðinn eða jafnvel rúsínur. Annars er ekkert mál að sleppa henni bara.
Aðferð:
- Hitið ofninn í 175°C. Minn er ekki með blæstri svo ég set á undir- og yfirhita.
- Þeytið smjörlíkið og sykurinn í stórri skál þar til það verður létt og svolítið ljóst.
- Sigtið út í skálina hveiti, lyftiduft, matarsóda, salt og krydd.
- Hellið út í mjólk, vanilludropum og eplaediki og hrærið þar til deigið er laust við kekki.
- Bætið sultunni út í og blandið varlega saman við deigið.
- Smyrjið tvö smelluform og skiptið deiginu í þau.
- Bakið í 40-60 mínútur. Það fer svolítið eftir ofninum hversu lengi kakan er að bakast en ég byrja að fylgjast með henni eftir u.þ.b. hálftíma.
- Látið botnana kólna áður en þið setjið kremið á.
Rjómaostskrem
- 200 gr vegan rjómaostur
- 100 gr Naturli-smjörlíki
- 2 msk. vanillusykur
- 500 gr flórsykur
- 1 msk. kanill
Aðferð:
- Byrjið á því að þeyta rjómaostinn og smjörlíkið.
- Bætið saman við flórsykri, vanillusykri og kanil og þeytið þar til kremið er létt og ljóst.
- Smyrjið botnana með kreminu og skreytið kökuna eftir smekk. Ég muldi niður piparkökur og stráði yfir.