Matur | mbl | 25.2.2020 | 18:17

Svaðalegasta kvöldmáltíð síðari ára

Ljósmynd/María Gomez

Hin eina sanna María Gomez á Paz.is á þessa uppskrift sem er ein sú SVAÐALEGASTA sem sést hefur í áratugi.

„Í stað kornflakes þá nota ég hér parmesan ost og ostanachos til að hjúpa kjúklinginn áður en hann er settur inn í ofn. Hér er ekkert steikt né djúpsteikt."

„Hér er lítið vesen á ferðinni og þarf í raun ekkert að útbúa nema kjúklinginn og piparmayóið. Rösti kartöflurnar keypti ég bara frosnar frá Aviko en þær eru mjög góðar og fást á mörgum stöðum í frystikæli," segir María um þennan stórkostlega rétt.

Boxmaster með rösti kartöflu, piparmayo, osti og nachos

Hráefni

1-2 pakkar Mission Wraps vefjur með grillrönd (það eru 6 í pakka)
Aviko Rösti kartöflur frosnar (reiknið með 2 í hvern Boxmaster)
4 kjúklingabringur
170 gr ostanachos
60 gr rifinn parmesan ostur
3 egg
2 tsk. timian
½ tsk. fínt borðsalt
1 tsk. cayenne
½ bolli hveiti
1 box af smátómötum að ykkar vali
1 pottur lambahasalat
Auka nachoflögur með ykkar uppáhalds bragði (osta, chili, salti eða papriku sem dæmi)
8 ostasneiðar

Piparmayo:

3 dl Heinz majónes
1/2 tsk. sítrónusafi beint úr ávextinum
1 og 1/2 tsk. svartur pipar
1/2 tsk. borðsalt

Aðferð

Setjið nachos og rifinn parmesan í blandara og maukið þar til orðið alveg að dufti
Setjið hveiti í eina skál og parmesan nachoið í aðra
Hrærið eggjunum saman ásamt salti, cayenne pipar og þurrkað Timian í þriðju skálina
Hitið ofninn á 210-220°C blástur
Skerið svo bringurnar þversum í gegn til að gera tvær þunnar bringur úr einni bringu svo úr verði 8 þunnar bringur
Byrjið á að velta kjúklingnum fyrst upp úr hveiti, svo eggi og að lokum upp úr parmesan nachos
Raðið bitunum á ofnplötu með bökunarpappa og setjið svo í ofn í 25-30 mínútur
Bakið Rösti kartöflunar með í jafnlangan tíma á sama hita
Útbúið grænmetið og piparmayóið á meðan
Skerið tómatana í litla bita og takið svo kálið í sundur úr pottinum
Í piparmayóið er öllu hrært saman þ.e majónesi, pipar, salti og sítrónusafa
Þegar kjúklingurinn er tilbúinn lækkið þá ofninn í 180°C og takið hann út. Setjið næst vefjur saman með því að smyrja á þær piparmajó, setja kál og tómata, 1 bita af kjúkling, 2 rösti og eina ostasneið ásamt nokkrum flögum af nachoi og enn meira piparmayo.
Brettið botninn af vefjunni upp og hliðarnar yfir botninn, gott er svo að stinga pinna í þær eins og nælu til að halda þeim saman
Setjið svo inn í 180°C heitan ofninn í 4 -5 mínútur