Matur | mbl | 5.2.2022 | 15:03

Framúrskarandi franskar vöffur að hætti Maríu Gomez

Ljósmynd/María Gomez

Eldhúsgyðjan María Gomez á Paz.is galdrar hér fram franskar vöfflur eins og meistarinn sem hún er. „Þegar ég fer í bakarí kaupi ég mér ansi oft franska vöfflu. Franskar vöfflur hafa verið til í bakaríi síðan ég man eftir mér. Það er bara eitthvað við stökkt ytra lagið og sæta mjúka kremið inn í sem ég fell alveg fyrir,“ segir María og flest tökum við sjálfsagt undir orð hennar enda franskar vöfflur syndsamlega góðar.

„Hér ákvað ég að gera míni útgáfu af franskri vöfflu en ég hef oft keypt þannig í stórvörumörkuðum og ég held þær séu hafðar þannig á danska mátann. Ég ákvað að sleppa því að dífa þeim í súkkulaði en ykkur er frjálst að gera það ef þið viljið hafa þær eins og í bakaríum landsins. Frönsku vöfflurnar er einfalt að gera, en þetta er frekar stór uppskrift og því tilvalið að baka til að eiga í frysti og taka út ef gesti ber að garði. Það dugir alveg að taka þær út eins og 15 mínútum áður en á að bera þær fram.“

Ljósmynd/María Gomez

Franskar Vöfflur

Deig

375 gr hveiti
375 gr mjúkt smjör
3 msk sykur eða hrásykur
1/2 tsk fínt borðsalt
1 dl vatn
1/2 dl rjómi eða nýmjólk
1 eggjahvíta til pennslunar og sykur til að dreifa yfir

Krem

200 gr mjúkt smjör
300 gr flórsykur
1 eggjarauða
1 tsk vanilludropar
1/2 dl rjómi

Aðferð

Deig

Setjið öll þurrefni saman í hrærivélarskál með króknum á og hrærið aðeins saman
Bætið næst við mjúku smjörinu skorið í teninga, vatninu og rjómanum og hnoðið vel saman þar til er orðið kekkjalaust og glansandi
Látið standa í kæli í 1 klst og gerið kremið á meðan

Krem

Setjið smjör í hrærivélina með þeytaranum á og þeytið þar til er orðið ljóst og loftkennt
Bætið þá flórsykri smátt saman við og hrærið áfram vel saman
Bætið svo vanilludropum, eggjarauðunni og rjómanum saman við og þeytið vel og lengi þar til kremið er vel loftkennt og í hvítari kantinum

Aðferð við vöfflurnar og samsetning

Fletjið kalt deigið út í þunnan ferning, eins þunnan og þið komist upp með án þess að sjáist í gegn
Skerið svo hringi út með hringskera eða glasi og teygið svo úr hringnum þannig að hann verði ílangur eins og vöfflurnar á myndinni
Endurtakið þar til allt deigið er búið og setjið á bökunarplötu með bökunarpappír
Stingið göt í deigið með gaffli, pennslið með eggjahvítunni og stráið þunnt lag af sykri yfir
Stingið svo inn í 220°C heitann ofninn með blæstri og bakið í 7-8 mínútur og látið kólna á plötunni
Þegar vöfflurnar hafa kólnað sprautið þá kremi á einn helming í þunni lagi og leggjið svo aðra vöfflu yfir
Ef þið viljið þá getið þið brætt dökkt súkkulaði og dýft helmingnum út í og látið storkna