Kjúklingasalatið sem kemur þér í gegnum daginn

Ljósmynd/Helena Gunnarsdóttir

Hér er á ferðinni einstaklega bragðgott kjúklingasalat með léttri pestódressingu. Það er auðvitað alltaf ljúffengt að gera heimalagað pestó en í þessari uppskrift má alveg spara sér sporin og kaupa tilbúið. Mozzarellakúlurnar passa ótrulega vel með bragðmikilli dressingunni og grilluðum kjúkling.

Kjúklingasalat með pestó og mozzarellakúlum
  • 700 g úrbeinuð kjúklingalæri/bringur

Dressing

  • 1 dl ólífuolía
  • 4 msk. grænt pestó
  • 1⁄2 stk. safi úr hálfri sítrónu
  • 2 stk. hvítlauksrif, hökkuð smátt
  • salt og pipar

Salat

  • 2 stk. romain salathöfuð eða annað salat eftir smekk
  • 1 askja kirsuberjatómatar, skornir í tvennt
  • 2 stk. avocado, skorin í sneiðar
  • 1 stk. lítill rauðlaukur, þunnt skorinn
  • 1 dós mozzarellakúlur (180 g)
  • rifinn parmesan eða Feykir eftir smekk

Aðferð:

  1. Hrærið saman öllu í dressinguna og smakkið til með salti og pipar. Ef ykkur finnst dressingin of þykk má bæta við örlitlu vatni.
  2. Hellið helmingnum af dressingunni yfir kjúklinginn og leyfið honum að marinerast í 30 mínútur eða lengur.
  3. Geymið restina af dressingunni inni í ísskáp.
  4. Grillið kjúklinginn þar til eldaður í gegn. Að sjálfsögðu má steikja kjúkling á pönnu eða elda í ofni sé grillið ekki nálægt.
  5. Takið inn og leyfið mesta hitanum að rjúka úr á meðan þið setjið salatið saman.
  6. Setjið salatið neðst á stórt fat og raðið grænmetinu fallega ofan á, endið á að skera kjúklinginn í þunnar sneiðar og raða yfir ásamt mozzarellakúlum.
  7. Toppið með pestódressingu og smá rifnum parmesan eða Feyki.

Höfundur: Helena Gunnarsdóttir

mbl.is