Harry Bretaprins hætti í vinnunni sem hann var fæddur til þess að gegna í fyrra. Hann segir í nýju viðtali við Fast Company að uppsagnir séu ekki endilega svo slæmar og að tækifæri felist í því að hætta í vinnunni.
Harry starfar nú fyrir BetterUp sem vinnur að því að stuðla að betri andlegri heilsu. Í viðtalinu er hann spurður út í kulnun á vinnustaðnum og fjölda uppsagna vegna Covid. Harry segir að margar uppsagnir séu ekki svo slæmar.
„Reyndar er það svo að með sjálfsvitund kemur þörf fyrir breytingar. Margt fólk um allan heim hefur verið fast í störfum sem veita því ekki gleði og er núna að setja andlega heilsu og hamingju í fyrsta sæti. Við eigum að fagna því,“ sagði Harry.
Harry hefur talað mikið um andlega líðan sína. Hann setti fjölskyldu sína og líðan hennar í fyrsta sæti þegar hann ákvað að segja skilið við bresku konungsfjölskylduna.