Fyrir þá sem eru bólgnir eftir langar vökunætur síðustu daga tók Smartland saman nokkur hagnýt húsráð til að minnka bólgur í andliti og líkama á þessum skemmtilega tíma sumarsins.
Vatn
Fylltu vaskinn þinn af köldu vatni og settu handfylli af klökum ofan í vaskinn. Gott er að blanda við vatnið nokkrum matskeiðum af andlitsvatni sem inniheldur rósavatn eða önnur efni sem minnka bólgur í andliti. Mælt er með því að dempa vatninu létt á andlitið í nokkur skipti, eða þangað til að þú finnur breytingar og minni bólgur.
Grænt te
Ef þú ert enn þá bólgin í andliti eftir vatnið er gott að dýfa grænum tepokum í vatn og setja þá síðan inn í ísskáp. Eftir að þú hefur farið í sturtu er gott að leggja kalda tepokana yfir augnsvæðið.
Komdu raka inn í húðina
Frábær leið til að koma raka inn í húðina er að leyfa rakamaska að vera á húðinni. Smartland mælir með rakamaska fyrir viðkvæma húð og helst maska sem má vera á húðinni í einhvern tíma.
Eftir að hafa notað maskann er mælt með góðu rakakremi yfir andlitið, háls og bringu.
Bað
Fátt er betra til að hreinsa líkamann en að leggjast í heitt Epson-baðvatn. Kveiktu á kertum og settu á góða tónlist á meðan baðsaltið tekur út óhreinindi úr húðinni og setur inn þau sölt sem þú þarft fyrir daginn. Rósablöð út í baðið minnkar bólgur og ef þú átt rósavatn er það jafnvel betra en bera má rósavatn á líkama og andlit.
Svitnaðu
Ef þú hefur ekki náð þeim árangri sem þú vilt með ofangreindum leiðum er mælt með góðri æfingu. Að fara út að hlaupa, út að ganga, eða í ræktina er frábær leið til að ná bólgum úr líkamanum. Ef þú ferð í sund er gott að taka heita og kalda pottinn á víxl og svitna í gufunni.
Að sofa með hátt undir höfðinu
Það getur virkað vel að nota tvo kodda ef maður vill minnka það að bólgur fari í andlitið og í kringum augun.
Matur og vatn
Byrjaðu á því að drekka nokkur glös af vatni strax um morguninn og vertu dugleg/duglegur að borða vatnsmelónu, agúrkur og fleira snakk sem er ríkt af vökva.