Breytti um lífsstíl eftir sjötugt

Það er aldrei of seint að taka heilsuna föstum tökum. Hin 74 ára Joan MacDonald er lifandi sönnun þess en hún var komin yfir sjötugt þegar hún ákvað að taka sig á og breyta um lífsstíl. MacDonald er í dag léttari og sterkari en áður. Hún er einnig vinsæll líkamsræktaráhrifavaldur á Instagram. 

MacDonald hefur náð ótrúlegum árangri með hjálp dóttur sinnar en hún þjálfar hana. Í sumar birti hún myndskeið af sér gera einfalda æfingu með handlóð frá því í fyrstu æfingavikunni fyrir þremur árum. Við hliðina má sjá hana gera æfinguna í dag og er hún ekki bara sterkari heldur er líkamsstaðan öll betri. Hún greinir þar frá því að hún hafi losað sig við tæp 30 kíló. 

Aukin lífsgleði hefur komið í kjölfar æfinganna og er MacDonald einnig með meira sjálfstraust en áður. Ánægja MacDonald geislar af henni á myndum sem hún birtir á samfélagsmiðlum. Hún nýtur þess meðal annars að klæða sig í falleg æfingaföt og smart sundfatnað. Ef kona á áttræðisaldri getur tekið sig í gegn á þennan hátt ættu fleiri að geta gert það. 

• Blogga um frétt