Marc Jacobs selur tveggja milljarða höll

Tískukóngurinn Marc Jacobs keypti nýtt hús á dögunum og nú er fjögurra hæða hús hans í New York komið á sölu. Húsið er á sölu hjá Sotheby's og er verðmiðinn rétt tæpar 16 milljónir Bandaríkjadala eða tæpir tveir milljarðar. 

Húsið er afar íburðarmikið og var fjallað um það í hinu virta hönnunartímariti Architectural Digest fyrir tveimur árum. Sagði fatahönnuðurinn í viðtalinu að hann væri ekki að eltast við eitthvert ákveðið útlit hann vildi frekar hafa hluti sem hann elskaði eins og húsgögn og listaverk. Hann vildi komast hjá því að láta heimili sitt líta út eins og gallerí. 

Mikið hefur breyst hjá fatahönnuðinum undanfarið en hann er ekki bara að flytja, þar sem í byrjun apríl gekk hann í hjónaband með Charley DeFrancesco.