Í Austurkór í Kópavogi er að finna einstaklega heillandi einbýlishús. Húsið stendur innarlega í botnlanga og því mikið næði fyrir þau sem það kjósa. Úr Austurkórnum er magnað útsýni yfir höfuðborgarsvæðið enda hefur hverfið stundum verið kallað Hollywood-hæðir Kópavogs.
Um er að ræða 252 fermetra einbýli sem var byggt árið 2017. Fjögur svefnherbergi eru í húsinu og tvö baðherbergi. Húsið er einstaklega fallega innréttað en ljós grár litur prýðir bæði veggi og loft í alrýminu.
Í eldhúsinu er svört innrétting og hvít borðplata. Blöndunartækin eru svört og sömuleiðis vaskurinn sem tónar fallega við innréttinguna og svarta Kitchenaid hrærvél á bekknum.
Hjónaherbergið er rúmgott og fallegt með sérbaðherbergi með sturtu. Lóðin er ófrágengin en gert er ráð fyrir heitum potti á veröndinni.
Ásett verð er 139.000.000 krónur.