Það var hátíðleg stund í Smárabíói í gærkvöldi þegar íslenska teiknimyndin Lói – þú flýgur aldrei einn var frumsýnd að viðstöddu fjölmenni. Hún er þrívíddarteiknimynd í fullri lengd og næstdýrasta mynd íslenskrar kvikmyndasögu en sú dýrasta er Þór – hetjur Valhallar. Hilmar Sigurðsson og Gunnar Karlsson hjá fyrirtækinu GunHil standa að gerð myndarinnar og komu um 400 manns að henni, bæði hér á landi og í Belgíu. Söguna um ófleyga lóuungann Lóa, sem myndin fjallar um, skrifaði Friðrik Erlingsson.