Útgáfuhóf barnabókarinnar Milli svefns og Vöku eftir Önnu Margréti Björnsson og Laufeyju Jónsdóttur var haldið að viðstöddu góðmenni á Hlemmi Square síðastliðið fimmtudagskvöld. Sagt var frá bókinni sem er tileinkuð Ásu Georgíu, dóttur Önnu Margrétar, sem fékk blóm í tilefni dagsins. Fjölfræðingurinn Palli Banine var DJ kvöldsins og spilaði dularfulla og ævintýralega tóna. Alkemistinn JARA steig á svið og lék nokkur lög.
Milli svefns og Vöku fjallar um hina myrkfælnu Vöku og samband hennar við dularfulla veru sem birtist á heimili hennar en enginn annar sér. Veran kemur í heimsókn á nóttunni og í fyrstu er Vaka skelkuð. Í gegnum söguna fer þó smám saman að renna upp fyrir henni að það er ekki allt slæmt sem tengist myrkrinu og hægt og bítandi sigrast hún á myrkfælninni. Hugmyndin að bókinni á sér rætur í raunveruleikanum en dóttir Önnu Margrétar sakaði oft „leynigest“ á heimili fjölskyldunnar um alls kyns dularfulla hluti sem hún sjálf kannaðist ekki við að hafa gert.
Anna Margrét og Laufey hafa ætíð verið heillaðar af barnabókum og ævintýralegum sögum sem vekja börn og fullorðna til umhugsunar, og geta jafnvel verið dálítið ógnvekjandi líkt og sígildu ævintýrin. Innblástur bókarinnar var sóttur til barnabóka sjötta, sjöunda og áttunda áratugarins og útlit bókarinnar sækir fagurfræði sína að vissu leyti þangað líka.
Í sköpunarferlinu leituðust Anna Margrét og Laufey eftir að texti og myndmál ynnu saman að framgangi sögunnar og að myndirnar myndu draga fram þræði úr sögunni og segja hana á annan eða stundum óvæntan hátt og þar með ýta undir ímyndunarafl barna sem lesa hana.
Bókin er í senn fögur, spennandi, fyndin og dálítið ógnvekjandi þótt allt fari vel að lokum. Hún hentar vel fyrir börn á aldrinum 6-10 ára en mun vonandi höfða til allra aldurshópa.