Benedikt Einarsson, eiginmaður Birgittu Haukdal og dansari með meiru, lét sig ekki vanta þegar dansskóli Jóns Péturs og Köru fagnaði 30 ára starfsafmæli með skemmtilegu teiti í höfuðstöðvum dansskólans í Síðumúla um helgina. Fjöldi gesta mætti og þar voru margir fyrrverandi og núverandi dansarar enda hafa fjölmargir Íslendingar lært dans í dansskólanum undanfarna þrjá áratugi. Að sjálfsögðu var þetta mikið danspartí og gestir skelltu sér á gólfið og dönsuðu m.a. zorba undir handleiðslu Jóns Péturs og Köru.

„Þetta var skemmtilegt afmæli og gaman að sjá marga af þeim sem við höfum kennt í gegnum tíðina. Sumir hafa farið alla leið í dansinum og náð langt og aðrir hafa lært dans einungis til að hafa gaman af. Dans er mikilvægur í mínum huga fyrir alla. Í samkvæmisdansinum er mikil nánd sem fer minnkandi með árunum en er okkur nauðsynleg. Það er líka mjög gaman í danstímunum og kemur fólki alltaf á óvart hversu góð og mikil hreyfing dansinn er,“ segir Kara. 

„Í framhaldi af farsælum 30 árum dansskólans verða nú ákveðnar breytingar. Dansskóli Jóns Péturs og Köru hefur verið með dansskólann í Reykjavík auk þess að sinna landsbyggðinni og öðrum verkefnum. Hefur skipulagið þróast þannig að ég hef sinnt skólanum hér í Reykjavík en Jón Pétur meira sinnt landsbyggðinni. Nú munum við á þessum tímamótum stíga skrefið til fulls og lýkur nú sögu Dansskóla Jóns Péturs og Köru. Því hef ég ákveðið að stofna á gömlum meiði minn eigin dansskóla sem fær nafnið Dansskóli Köru og Jón Pétur sinn skóla, JPD ehf. Við hlökkum bæði til að halda áfram að kenna Íslendingum dans í nánustu framtíð enda er fátt skemmtilegra,“ segir Kara ennfremur.