Guðmundur Kristjánsson útgerðarmaður lét sig ekki vanta þegar fyrstu tveir þættirnir af Thin Ice voru frumsýndir í Bíó Paradís. Guðmundur tengist þáttunum að því leytinu til að sambýliskona hans, Helga I. Stefánsdóttir, hannaði búninga þáttaraðarinnar.
Thin Ice er átta þátta umhverfis-, pólitísk, spennudramaþáttaröð sem hefur verið í þróun og framleiðslu í um sex ár. Þáttaröðin verður frumsýnd á TV4/Cmore í Svíþjóð í byrjun febrúar og verður fyrsti þáttur sýndur á RÚV 16. febrúar.
Stórleikkonan Lena Endre og framleiðandinn Sören Stærmose áttu hugmyndina að þáttaröðinni en þau fengu íslenska handritshöfunda til að skrifa handritið, það eru þeir Birkir Blær Ingólfsson, Jónas Margeir Ingólfsson og Jóhann Ævar Grímsson en þáttaröðin er framleidd af Yellow Bird og Sagafilm.
Leikstjórar seríunnar eru Cecilie Mosli, Thale Persen og Guðjón Jónsson.
Þáttaröðin er öll tekin upp á Íslandi fyrir utan nokkra tökudaga á Grænlandi. Stykkishólmi var breytt í grænlenskt þorp í upphafi síðasta árs. Verkefnið er stærsta framleiðsluverkefni síðasta árs og eitt af stærri kvikmyndaverkefnum Norðurlandanna.