Multis opnaði jólasýninguna „Svona gerum við“ á Hafnartorgi, Tryggvagötu 21 nýverið, þar sem gestir og gangandi litu við og skoðuðu verk eftir meðal annars Rúrí Fannberg. Á sýninguna mættu myndlistakonan Arna Gná Gunnarsdóttir og Anna Tara Edwards, sem fangaði athygli landsmanna í kvikmyndinni Þriðji Póllinn, ásamt söngvaranum Högna Egilssyni. Birna Paulina Einarsdóttir kvikmyndaframleiðandi og Valur Árnason lögfræðingur mættu á sýninguna og eru þau nýtt par. Einnig voru þar þær Arna Gerður Bang sérfræðingur á Alþingi, Soffía S. Sigureirsdóttir almannatengill, Guðrún Tinna Ólafsdóttir framkvæmdastjóri og Ingibjörg Agnes Jónsdóttir arkitekt. 

„Myndlistarmennirnir sem við störfum með eru fjölbreyttir, sá elsti er Magnús Pálsson, landsþekktur áhrifavaldur í íslenskri myndlist sem fæddur er á þriðja áratug síðustu aldar, en yngsti listamaðurinn er fæddur árið 1990. Við hjá Multis sérhæfum okkur í útgáfu, kynningu og sölu á listaverkum samtímalistamanna og erum með sérstaka áherslu á fjölfeldi ( e multiples) sem er myndlist sem gerð er í upplagi. 

Á opnuninni í byrjun desember, vorum við með áherslu á valin listaverk sem unnin eru sem fjölfeldi eftir Rúrí Fannberg,“ segir Ásdís Spanó myndlistarkona og annar þriggja eigenda Multis.

Fram að jólum verður lifandi dagskrá í sýningarsalnum á Hafnartorgi með opnunum, bókaútgáfum og gjörningum og má nefna að 4. desember var Snorri Ásmundsson með kynningu á nýju verki og útgáfu á prentverkum og hélt hann jólatónleika við það tilefni á sinn hátt.

„Í desember verða síðan kynningar á nýjum verkum eftir listamennina Magnús Helgason, Sirru Sigrúnu Sigurðardóttur og Þórdísi Erlu Zoëga. Við verðum með bókaútgáfu Jónu Hlífar Halldórsdóttur á bókverkinu Brim Hvít Sýn, einnig verður Gjörningaklúbburinn með gjörning á tímabilinu,“ segir Ásdís Spánó.