Veitingastaðurinn Jómfrúin opnaði nýlega veitingastað á Keflavíkurflugvelli. Af því tilefni var slegið upp veislu á staðnum og því fagnað að ferðalangar geti gætt sér á dönsku smurbrauði og áður en Ísland er yfirgefið. 

„Það eru mjög spennandi tímar framundan hjá Jómfrúnni. Ég hef lengi haft mikinn áhuga á rekstri á flugvellinum og það er mín skoðun að veitingastaður eins og Jómfrúin eigi mjög vel heima í þessu flugvallarumhverfi. Mér finnst það flott nálgun hjá Isavia að upplifun fólks af borginni sem það heimsækir geti teygt sig til flugvallarins. Keflavíkurflugvöllur er aðalgáttin að Íslandi en völlurinn er einnig hliðið að Reykjavík, þar sem minn staður hefur starfað með stolti í bráðum 28 ár. Við Jómfrúarfólk hlökkum til að bjóða flugvallargestum upp á hina heilögu þrenningu; smurbrauð, öl og snaps,“ segir Jakob E. Jakobsson, eigandi Jómfrúarinnar. 

Jómfrúin í Keflavík er svipuð og samnefndur staður í 101 Reykjavík. Innréttingar og veitingar ríma á báðum stöðum. 

Það er alþjóðafyrirtækið SSP sem sér um rekstur Jómfrúarinnar á Keflavíkurflugvelli en fyrirtækið sérhæfir sig í rekstri veitingastaða á flugvöllum og rekur yfir 2.600 slíka staði víða um heim, þar á meðal veitingastaðinn Elda sem nýverið opnaði á Keflavíkurflugvelli. 

„Við hjá SSP erum gríðarlega ánægð með að standa að opnun Jómfrúarinnar á Keflavíkurflugvelli. Að okkar mati er hún virkilega góð viðbót við framboðið sem fyrir er á flugvellinum. Við vonumst til þess að flugfarþegar grípi tækifærið til að hefja fríið enn fyrr en ella og komi sér fyrir í notalegu umhverfi sem margir þekkja nú þegar, frá Jómfrúnni í miðborginni,“ segir Jón Haukur Baldvinsson, framkvæmdastjóri SSP á Íslandi.