Ertu í haltu mér slepptu mér sambandi?

Það þekkja allir í það minnsta eitt par sem er sífellt að byrja saman og hætta saman. Bustle vísar í rannsókn sem gerð var nýverið þar sem fram kemur að slíkt mynstur getur verið mjög skaðlegt fyrir fólk sem er fast í þessum vítahring að vera að halda og sleppa.

Það getur verið erfitt að horfa á vini sína fasta í svona samböndum, þar sem augljóst er fyrir utanaðkomandi aðila að sambandið mun ekki ganga upp þótt parið eigi erfitt með að sleppa tökunum og halda áfram með lífið.

Hver man ekki eftir Ross og Rachel í Friends? Samband þeirra var ljóslifandi dæmi um hverslags áskorun það er að vera í haltu mér slepptu mér sambandinu.

Vinir fólks á þessum stað upplifa einnig andlegar áskoranir, þegar þeir dragast inn í atburðarásina þegar allt er hræðilegt annars vegar og svo hins vegar að þurfa að setja upp grímuna þegar allt er orðið geggjað gott aftur. 

Monk segir að skilnaður þurfi ekki alltaf að vera neikvæður, þar sem fólk skilur út af alls konar ástæðum. Hlutir gerast og breytast hjá fólki og stundum getur fjarlægðin búið til súrefni á milli fólks svo það geti séð betur hvað fór úrskeiðis í sambandinu. Báðir aðilar geta tekið ábyrgð og breytt hjá sér og þannig farið saman inn í framtíðina. Hins vegar þegar fólk er stöðugt í þessu mynstri hefur það áhrif á andlega heilsu fólks að mati rannsakenda.

Niðurstöðurnar gefa til kynna að fólk sem er fast í haltu mér slepptu mér sambandi þurfi að skoða hvað liggur að baki hjá sér. „Ef parið viðurkennir að þetta sé ákveðið mynstur geta einstaklingarnir gert vissar breytingar hjá sér, tekið ábyrgð og haldið áfram eða endað sambandið á heilbrigðan hátt.“

Anita Chlipala, fjölskylduráðgjafi og rithöfundur, segir að fólk fari aftur inn í eitruð sambönd út af nokkrum óheilbrigðum ástæðum. Kannski álykta einstaklingar sem svo að maki sinn hafi breyst. Ef til vill vilja þau ekki skemma það sem búið er að fjárfesta í tengt sambandinu. Kannski telja þau maka sinn hinn eina sanna, eða að sambandið hafi stundum verið gott.  Þau vilja ekki vera ein, eða ekki vera á markaðnum aftur.

Ef annar aðilinn eða báðir fara ekki í ráðgjöf, eða breyta hegðun sinni á marktækan hátt, ber fólki að varast að fara aftur í gömul sambönd sem hafa ekki virkað til þessa.

„Þú verður að skoða allt sambandið, ekki einungis góðu tímana. Ekki blekkja sjálfan þig með því að þó að einhver lofi öllu fögru geti sá hinn sami breyst án mikillar fyrirhafnar. Ef manneskjan á svona auðvelt með að breyta, af hverju hefur hún ekki gert það áður? Ef ekkert sérstakt liggur að baki loforðinu nema orðin fögur myndi ég halda mig frá því að fara í sambandið aftur.“

Hvernig þú bindur enda á mynstrið

Þegar þú elskar einhvern, eða þú ert tengdur einhverjum sterkum tilfinningarböndum, getur það verið auðveldara sagt en gert að enda sambandið. „Ef þú vilt að sambandið taki enda í eitt skiptið fyrir öll er nauðsynlegt að setja mörk,“ segir Melanie Shapiro félagsráðgjafi. Sem dæmi getur þú beðið manneskjuna sem þú varst í sambandi með að hringja ekki í þig, senda þér ekki skilaboð eða að hætta að fylgja þér á samfélagsmiðlum og gert hið sama fyrir hana. 

Þetta er alltaf erfitt, en minntu þig á að þú veist hvernig hlutirnir enda ef þið takið saman aftur. Þú hefur þá ef til vill farið margoft í gegnum skilnað og veist að þú lifir það af í þetta skiptið líka. Eins getur þú ekki vænt þess að fá aðra niðurstöðu í ykkar mál ef þú gerir alltaf hið sama. 

Hins vegar ef þú eða maki þinn hafið bæði gert hluti sem skipta máli til að breyta hjá ykkur. Þið hafið farið í djúpa sjálfskoðun, verið heiðarleg við hvort annað og eruð tilbúin að leggja vinnu í að byggja upp nýtt samband frá grunni mælir Shapiro áfram með mjög sterkum mörkum og grundvallareglum. 

• Blogga um frétt