Það eru ekki bara Íslendingar sem dæla í sig skyri í tíma og ótíma heldur hefur það farið vel ofan í erlenda ferðamenn líka. Japanska parið Nori og Asaki gekk þó skrefinu lengra og bauð upp á skyr í brúðkaupinu sínu en þessari fæðu höfðu þau kynnst á ferð sinni um Ísland.
Parið trúlofaði sig í Bláa lóninu og þegar heim var komið og undirbúningur hófst fyrir brúðkaupið vildu þau endilega bjóða upp á skyr í brúðkaupinu sínu.
Draumurinn var að leyfa gestunum að smakka íslenska skyrið sem þau tóku ástfóstri við og því settu þau sig í samband við Mjólkursamsöluna og óskuðu eftir aðstoð við að flytja Ísey-skyr til Japans.
Þessari sérstöku og skemmtilegu beiðni var vel tekið og var ákveðið að gefa þessum ungu verðandi hjónum skyrið að gjöf. 200 dósum af Ísey-skyri var pakkað eftir kúnstarinnar reglum og flutt með flugi til Japans. Með sendingunni fóru jafnframt tvær íslenskar lopapeysur sem Nori og Asaki fengu í brúðargjöf frá Mjólkursamsölunni. Eins og sést á myndunum slógu gjafirnar í gegn.
Brúðhjónin þurfa þó ekki að bíða lengi eftir að fá meira af Ísey-skyri því stuttu eftir brúðkaupið skrifaði Ari Edwald, forstjóri MS, undir framleiðslu- og vörumerkjasamning á Ísey skyri við Nippon Luna, mjólkurvörufyrirtæki í Japan.