Almenningur virðist ekki geta fengið nóg af Instagram-ljóðskáldinu Rupi Kaur sem fjallar um það að vera kona, ástina og ástarsorg á ljóðrænan hátt. Það sama má segja um tímarit út um allan heim sem elska að fjalla um þessa áhugaverðu 25 ára konu sem fædd er á Indlandi en flutti ung að aldri til Kanada. Madonna vakti meira að segja athygli um daginn, þegar hún fór með texta úr ljóði Kaur þegar hún bað konur afsökunar á að hafa kallað þær fallegar.
Það að vera „Instagram“-listamaður þykir misfínt, en þýðir að maður notar Instagram til að kynna vörur sínar beint til heimsins. Kaur hefur gefið út tvær ljóðabækur á undanförnum árum. „Milk and Honey“ kom út árið 2014 og seldust 2,5 milljónir eintaka af bókinni. Hún var í yfir 77 vikur á lista New York Times yfir mest seldu bækurnar. Önnur bók hennar „The Sun and Her Flowers“ kom út árið 2017 og hefur vakið það mikla athygli að New York Times birti grein um að Kaur væri að sparka upp útgáfuhurðinni um þessar mundir.
Það gefur auga leið að unga fólkið kann að nota samfélagsmiðlana á þann hátt að það nær beint til heimsbyggðarinnar. Ef marka má velgengni Kaur að undanförnu má segja að ef þú setur efnið þitt út á Instagram og það kemur beint frá hjartanu, máttu bóka að einhvers staðar þarna úti sé til fólk sem meðtekur boðskapinn.
Spurningin er svo alltaf sú hversu marga þú hittir með boðskap þinn og hvort það verði Madonna.