Klæðaburður kvenna í bresku konungfjölskyldunni vekur jafnan athygli. Á meðan yngri fjölskyldan keppist um að mæta í dýrum hönnunarflíkum lætur sú eldri stundum gamla gimsteina duga eins og Anna prinsessa gerði í vikunni þegar hún mætti í hátíðlega messu í Westminister Abbey ásamt fjölskyldu sinni.
Anna sem er 67 ára gömul dóttir Elísabetar Englandsdrottningar og þar með systir Karls Bretaprins stal senunni í ljósri kápu sem hún klæddist meðal annars í Derby árið 1985. Var hún nánast eins klædd með svarta leðurhanska, leðurtösku og skóm með lágum hæl. Eina sem var öðruvísi var hatturinn, hárgreiðslan var meira að segja sú sama og árið 1985.
Richard Palmer, konunglegur blaðamaður Express, greindi því að að kápan væri jafnvel frá því seint á áttunda áratugnum. Fékk blaðamaðurinn seinna ábendingu á Twitter um að Anna hefði líka klæðst kápunni árið 1980.
Vakti Palmer einnig athygli á því að Meghan hafi klæðst kápu sem kostaði rúmlega 120 þúsund krónur og Katrín kápu sem kostaði 90 þúsund á meðan prinsessan klæddist 40 ára gamalli kápu.