Það var brjálað að gera hjá leikkonunni Kerry Washington á miðvikudaginn en hún passaði þó að láta ekki sjá sig í sama dressinu tvisvar. Alls sást Washington í fjórum mismunandi dressum en í hvert skipti sem hún skipti um föt lét hún laga á sér hárið.
Á milli þess sem hún mætti í sjónvarpsþætti mætti hún á galakvöld Lehman College í fallegum síðkjól frá Delpozo.
Washington byrjaði daginn á því að mæta í sjónvarpsþáttinn Good Morning America í grænni kápu. Fylgihlutirnir voru aðalatriðið en leikkonan var með stóra gyllta eyrnalokka, hvít stór sólgleraugu og í appelsínugulum skóm frá Giuseppe Zanotti.
Hún skipti um föt eftir þáttinn til þess að mæta í annan sjónvarpsþátt og gekk um götur New York í fallegri rauðri kápu og einstaklega flottum blómabuxum frá Proenza Schouler.
Síðasti viðkomustaður Washington var spjallþáttur Jimmy Fallon þar sem Washington geislaði í glitrandi kjól frá Erdem.