Bandaríska fatamerkið birti myndir af nýrri haust- og vetrarlínu merkisins í gær. Supreme sérhæfir sig í að hanna götufatnað og er sérstakt fyrir þær sakir að fötin eru framleidd í takmörkuðu magni og ekki framleidd aftur.
Í haustlínunni má finna litríka jakka og úlpur með töff mynstri. Supreme hefur verið vinsælt á Íslandi síðastliðin ár. Fatamerkið var stofnað árið 1994 og er þekkt fyrir að hanna föt í samstarfi við aðra tískurisa á borð við Nike/Air Jordan, The North Face, Levi's, Timberland og Stone Island.
Aðeins eru ellefu Supreme-verslanir í heiminum og eru föt frá Supreme aðeins seld í þeirra eigin verslunum. Verslanirnar eru staðsettar í New York, Los Angeles, París, London, Tókýó, Osaka, Nagoya og Fukuoka.
Allar vörurnar í línunni verða ekki aðgengilegar á sama tíma heldur fara aðeins nokkrar flíkur í sölu í hverri viku.