Stjörnusnyrtifræðingurinn Nichola Joss er þekkt fyrir að vera í uppáhaldi hjá Gwyneth Paltrow, Meghan hertogaynju af Sussex og vinkonu hennar Priyönku Chopra. Í viðtali við Refinery29 mælti Joss með því að fólk gerði sína eigin andlitsmaska heima.
„Þeir eru einfaldir, ókeypis og þú hefur fulla stjórn á efnunum sem þú ert að setja á húð þína sem er ástæða þess að flestir kúnna minna elska þá,“ sagði Joss og gaf uppskrift með innihaldsefnum sem eru til í flestum nútímaeldhúsum.
Kókosolía
Kókosolían er ekki bara sögð góð fyrir húðina heldur notar Joss hana til þess að halda maskanum saman.
Túrmerik
Túrmerik er allra meina bót og af hverju ekki að setja smá á andlitið á sér. Joss segir jurtina hafa róandi áhrif auk þess sem hún hjálpi með bólgur.
Hafrar
Hafrar á húðina hljómar skringilega en Joss fullvissar lesendur um að þeir geti gert kraftaverk fyrir húðina þegar því er blandað saman við eitthvað eins og kókosolíu eða hunang.
Hunang
Haframjöl og hunang er góð blanda til þess að búa til góðan heimatilbúin andlitsmaska að sögn Joss.
Eggjahvíta
Eggjahvítan er full af prótíni og segir Joss það gefa húðinni ljóma að nota lífræna eggjahvítu í andlitsmaskann.