Bonnie Rodríguez Krzywicki hefur slegið í gegn á samfélagsmiðlinum Instagram fyrir að kenna fólki með einföldum hætti hvernig líta megi betur út á mynd. Þá er hún einnig með rás á Youtube þar sem hún fer ítarlegar í hverja stellingu. Krzywicki er nemi í ljósmyndun og þekkir því sitt fag.
Hverri mynd fylgja leiðbeiningar um hvernig má ná sem mestu úr myndatökunni. Einföld ráð eins og að setja annan fótinn fram, vera beinn í baki, horfa til hliðar og svo framvegis. Þá mælir hún með því að fólk forðist að vera „flatt“ á myndum, sem fæst með því að snúa líkamanum örlítið og rétta úr limum líkt og verið sé að teygja sig í eitthvað. Þá er gott að setja annan handlegginn á mjöðmina. Smartland mælir með að fylgja þessari á Instagram.