Óskarsverðlaunaleikarinn Joaquin Phoenix frumsýndi nýja klippingu á Kvikmyndahátíðinni í New York í Bandaríkjunum í gær. Klippingin hefur vakið athygli, en hún þykir talsvert furðuleg.
Phoenix, sem vanalega hefur skartað hefðbundinni herraklippingu, hefur látið raka yfir hvirfilinn á sér en heldur hárinu í hliðunum.
Leikarinn huldi hár sitt þegar hann tók þátt í pallborðsumræðum um kvikmynd sína C'mon C'mon en tók húfuna af þegar hann stillti sér upp fyrir myndatöku á rauða dreglinum.
Kvikmyndin fjallar um útvarpsmann sem ferðast þvert yfir Bandaríkin með ungum frænda sínum. Hann þurfti þó ekki að klippa sig svona fyrir hlutverkið.