Smartland Mörtu Maríu | Tíska | mbl | 5.3.2024 | 12:00

Laufey heiðruð á forsíðu tískutímarits

Laufey Lín Jónsdóttir klæðist fötum frá ítalska tískuhúsinu MiuMiu á forsíðunni. Samsett mynd

Laufey Lín Jónsdóttir, söngkona og lagahöfundur, prýðir forsíðuna á nýjasta hefti tímaritsins Female í Singapúr. Heftið, sem er titlað „The Celebrity Edition“, heiðrar nokkra listamenn Z-kynslóðarinnar sem þykja hafa skarað fram úr á liðnu ári.

Djasssöngkonan var ljósmynduð af tískuljósmyndaranum Olivier Simille og klæddist fallegum flíkum frá ítalska tískuhúsinu Miu Miu. Laufey deildi myndum úr tökunni á Instagram-síðu sinni á þriðjudag.

Þetta er ekki í fyrsta sinn sem djasssöngkonan prýðir forsíðu á erlendu tímariti. Hún sat fyrir á forsíðumynd eins þekktasta tónlistartímarits í heimi, Billboard, fyrr á þessu ári.

Frétt af mbl.is

Laufey prýðir forsíðu Billboard

Ræddi við Elton John

Hin 24 ára gamla Laufey er og hefur verið á sannkallaðri sigurför um heiminn. Unga söngkonan var á dögunum gestur í hlaðvarpi stórstjörnunnar Eltons Johns, Rocket Hour.

Í þættinum lofsamar John tónlist Laufeyjar og hrósar henni í hástert. Þau ræddu meðal annars um yfirstandandi tónleikaferðalag hennar, en hún fór beinustu leið í tónleikaferðalag af Grammy-verðlaunahátíðinni í Los Angeles þar sem hún hlaut sín fyrstu Grammy-verðlaun.