Guðni Bergsson, formaður KSÍ, reyndi að fá Geir Þorsteinsson til þess að endurskoða þá ákvörðun að bjóða sig fram gegn sér í formannskjöri sambandsins.
Geir var formaður KSÍ á árunum 2007 til 2017 en steig til hliðar árið 2017 þegar Guðni var kjörinn. Geir var í kjölfarið titlaður heiðursformaður KSÍ, en hefur nú ákveðið að taka slaginn á ný. Guðni hefur gegnt embættinu undanfarin tvö ár og hyggst sækjast eftir endurkjöri.
Geir staðfesti framboð sitt fyrst í útvarpsþætti Fótbolta.net á X-inu á laugardag og lét Guðna vita rétt áður.
„Kortéri fyrir viðtalið hringdi hann í mig og við ræddum þetta stuttlega. Ég hvatti hann til að endurskoða þessa ákvörðun og hugsa þetta betur,“ sagði Guðni við fotbolti.net í dag.
Ársþing KSÍ verður haldið 9. febrúar næstkomandi á Hilton Reykjavík Nordica.