Helgi Valur Daníelsson, fyrrverandi landsliðsmaður í knattspyrnu, mun spila áfram með Fylki og taka slaginn með liðinu næsta sumar. Þetta kemur fram í fréttatilkynningu frá félaginu.
Helgi Valur er fæddur árið 1981 og kom til liðs við uppeldisfélag sitt Fylki síðastliðinn vetur. Hann hafði þá ekkert spilað frá árinu 2015 og kom við sögu í 13 leikjum í Pepsi-deildinni síðasta sumar.
Helgi Valur spilaði 68 leiki í meistaraflokki Fylkis áður en hann fór í atvinnumennsku en þar spilaði hann yfir 300 leiki með liðum eins og Peterborough í Englandi, Öster, Elfsborg og AIK í Svíþjóð, Hansa Rostock í Þýskalandi, Beleneses í Portúgal og AGF í Danmörku en þar kláraðist samningur hans 2015. Helgi hefur spilað 38 leiki með yngri landsliðum og 33 leiki með A-landsliði Íslands.