Markvörðurinn Anton Ari Einarsson mun ganga til liðs við Breiðablik eftir lok núverandi tímabils þegar samningi hans við Val lýkur í haust. Þetta kemur fram í tilkynningu frá Blikum nú í kvöld.
Anton Ari er fæddur árið 1994 og verður því 25 ára á þessu ári. Hann er uppalinn í Aftureldingu en árið 2014 gekk hann til liðs við Val. Anton varð Íslandsmeistari með Valsmönnum, sumarið 2017 og 2018, en hann hefur ekki átt fast sæti í liði Valsmanna síðan Hannes Þór Halldórsson samdi við félagið í vor.
„Við bjóðum Anton Ara hjartanlega velkominn í Kópavoginn um leið og við óskum honum góðs gengis í baráttunni það sem eftir er af núverandi tímabili með Hlíðarendafélaginu,“ segir í tilkynningu frá Blikum, en Anton gerir þriggja ára samning við Blika.