Vonast til að halda markaskoraranum

Mikel Arteta knattspyrnustjóri Arsenal kveðst vonast til þess að geta haldið framherjanum öfluga Pierre-Emerick Augameyang sem skoraði tvívegis í sigri liðsins á Everton í dag, 3:2, í ensku úrvalsdeildinni.

Aubameyang er þar með búinn að skora 19 mörk fyrir Arsenal á tímabilinu en hann er með samning til sumarsins 2021 og hefur verið orðaður við Barcelona sem er sagt hafa reynt að kaupa hann í janúar.

„Þeir eru alveg með rétt á því að vilja fá hann því hann er frábær leikmaður. Stóru liðunum líst vel á hann og vonandi tekst okkur að sannfæra hann um að vera um kyrrt. Ég veit að hann er með stórar væntingar, vill spila í stærstu keppnunum og með bestu leikmönnunum. Við verðum að hjálpa honum að ná því. Hann er tvímælalaust okkar mikilvægasti leikmaður og vonandi náum við að halda honum,“ sagði Arteta.

• Blogga um frétt