Tekur Allegri við Manchester United?

Ítalinn Massimiliano Allegri verður næsti knattspyrnustjóri Manchester United ef félagið lætur Ole Gunnar Solskjær fara vegna slæmra úrslita að undanförnu. Þetta er fullyrt í Daily Express í dag.

United steinlá á heimavelli gegn Tottenham, 1:6, í síðasta leiknum fyrir landsleikjahléið og er í sextánda sæti úrvalsdeildarinnar eftir að hafa tapað tveimur af fyrstu þremur leikjum sínum á tímabilinu, báðum á heimavelli. Hinn tapleikurinn var gegn Crystal Palace.

Allegri stýrði Juventus um árabil og vann þar ítalska meistaratitilinn fimm sinnum og ítalska bikarinn fjórum sinnum ásamt því að hljóta tvívegis silfurverðlaun í Meistaradeild Evrópu. Hann hætti störfum hjá félaginu á síðasta ári.

• Blogga um frétt