Manchester United og Arsenal mættust á Old Trafford í 37. umferð ensku úrvalsdeildarinnar í knattspyrnu í dag. Leikar enduðu 1:0 fyrir Arsenal sem þýðir að liðið er komið aftur á toppinn með 86 stig. Manchester United situr ennþá í 8. sæti með 54 stig.
Leikurinn byrjaði tiltölulega rólega og var United aðeins meira með boltann fyrstu mínúturnar. Á 20. mínútu fékk Havertz boltann aleinn á hægri kantinum eftir að hafa verið spilaður réttstæður af Casemiro í vörn United-manna. Havertz keyrði inn á teig United og fann Trossard í markteignum sem kláraði í fyrsta framhjá Onana í marki United, 1:0 fyrir Arsenal.
Manchester United var áfram meira með boltann en vörn Arsenal-manna var þétt og náðu United-menn ekki að skapa sér hættuleg færi þrátt fyrir nokkrar álitlegar sóknir. Staðan í hálfleik, 1:0 fyrir Arsenal.
Síðari hálfleikurinn byrjaði rólega, Arsenal var meira með boltann en sköpuðu sér engin færi. United náði síðan ágætis kafla en Arsenal-menn voru þéttir og vörðust vel. Á 79. mínútu fékk Martinelli besta færi seinni hálfleiksins en skot hans var frábærlega varið af Onana.
United pressuðu Arsenal síðustu mínúturnar án þess að skapa sér dauðafæri. Lokaniðurstaða, 1:0 fyrir Arsenal, gífurlega mikilvæg þrjú stig í baráttunni um Englandsmeistaratitilinn.