Cloé Lacasse, sem lék í fimm ár með ÍBV og er með íslenskan ríkisborgararétt, skoraði tvö mörk fyrir SL Benfica í 6:0-sigri á Ovarense í efstu deild Portúgals í fótbolta í dag. Þá lagði hún upp eitt mark til viðbótar.
Cloé er komin með 19 mörk í aðeins 13 deildarleikjum með SL Benfica og hefur farið á kostum með liðinu. Var sérstaklega fjallað um Cloé á heimasíðu portúgalska félagsins í dag og hún valin maður leiksins.
SL Benfica hefur haft mikla yfirburði í deildinni til þessa og unnið alla 13 leiki sína, skorað 94 mörk og aðeins fengið á sig eitt, þrátt fyrir að vera nýliði.