Enska knattspyrnusambandið mun fá að vita það næstkomandi mánudag hvort að enska karlalandsliðið muni þurfa að spila heimaleiki fyrir luktum dyrum vegna þeirra óspekta sem enskir stuðningsmenn gerðust sekir um í aðdraganga úrslitaleiks EM á Wembley í sumar.
Evrópska knattspyrnusambandið, UEFA, mun halda nefndarfund þar sem farið verður yfir málið næstkomandi mánudag.
Í úrslitaleik Englands gegn Ítalíu á Wembley í sumar slógust stuðningsmenn Englendinga við gæsluliða og lögregluþjóna er þeir reyndu að þvinga sér leið inn á leikvanginn áður en leikurinn hófst.
Hundruðum stuðningsmanna tókst að brjóta sér leið inn á leikvanginn án þess að vera með miða.
Enska knattspyrnusambandið hóf sína eigin rannsókn á málinu viku eftir úrslitaleikinn og greindi frá því að sambandinu væri mikið í mun að þau hneykslanlegu atvik sem settu blett á úrslitaleik EM 2020 yrðu aldrei endurtekin.
Líklegt er talið að UEFA muni í ákvörðun sinni einblína á hvort öryggisgæsla á leiknum hafi verið viðunandi.