Hatrömm forræðisdeila yfir 11 mánaða gömlum dreng hefur neytt Victoriu Azarenka til þess að draga sig úr keppni áður en Opna ástralska meistaramótið í tennis hefst síðar í mánuðinum.
Azarenka mun ekki fá leyfi til þess að yfirgefa Kaliforníuríki Bandaríkjanna með syni sínum, Leo, fyrr en niðurstaða er komin í forræðisdeiluna. Hún er 28 ára gömul og var um tíma í efsta sæti heimslistans, en hún hefur ekki spilað síðan á Wimbledon-meistaramótinu í fyrra.
Azarenka bætist í hóp fleiri stjarna sem hafa dregið sig úr keppni, meðal annars munu Serena Williams og Andy Murray missa af mótinu. Þá er þátttaka Rafael Nadal og Novak Djokovic einnig í hættu.