SR náði í kvöld þriggja stiga forystu í Hertz-deild karla í íshokkí með því að sigra Björninn, 7.4, í Reykjavíkurslag í Skautahöllinni í Laugardal.
SR er með 11 stig, SA Víkingar 8 stig og Björninn 5 stig. Reykjavíkurliðin hafa nú bæði spilað 6 leiki en Akureyringar eru aðeins búnir með fjóra leiki.
SR var 3:1 yfir eftir fyrsta leikhluta og komst í 6:2 í öðrum hluta. Björninn minnkaði muninn í 6:4 áður en honum lauk en Styrmir Friðriksson innsiglaði sigur SR þegar hann skoraði sjöunda mark liðsins í byrjun síðasta leikhluta.
Egill Þormóðsson skoraði fyrstu þrjú mörk SR í leiknum en Miloslav Racansky, Patrik Podsednicek og Richard Kovarik sáu um hin þrjú mörkin áður en Styrmir skoraði það sjöunda.
Kristján Kristinsson skoraði þrjú marka Bjarnarins og Andri Helgason eitt.