Ólafía Þórunn Kristinsdóttir mun þurfa að hafa sig alla við til að halda keppnisrétti sínum í LPGA-mótaröðinni í golfi eftir að hafa samtals leikið á +12 höggum í fyrri hluta lokastigs úrtökumótsins.
Leikið er á völlum Pinehurst-golfklúbbsins í Norður-Karólínu. Fyrri fjórir hringirnir hafa verið leiknir og nú skipta kylfingarnir um völl og leika fjóra hringi til viðbótar frá miðvikudegi til laugardags.
Ólafía er sem stendur í 81. sæti en 45 efstu kylfingar mótsins tryggja sér keppnisrétt í sterkustu mótaröð heims á næsta ári. Kylfingarnir í 43.-45. sæti eru á +6 höggum svo ljóst er að mikið þarf að breytast hjá Ólafíu í seinni hluta mótsins til að hún haldi keppnisrétti sínum.