Kórónuveiran er byrjuð að hafa áhrif á golf eins og flestar aðrar íþróttir og hafa stærstu mótaraðir heims frestað mótum sínum vegna útbreiðslu veirunnar.
Fyrr í dag var tilkynnt að Players-meistaramótinu yrði frestað en til stóð að mótið færi fram án áhorfenda, það var hins vegar snögglega hætt við það.
Þá hefur næstu fjórum mótum í PGA-mótaröðinni verið aflýst vegna veirunnar: Valspar-meistaramótinu á Flórída, WGC-Dell Technologies Match Play í Texas, Corales Puntacana Resort and Club-meistaramótinu í Dóminíska lýðveldinu og Valero Texas Open í Texas.
Í dag bættust við frestanir í LPGA-mótaröðinni. Næstu þremur mótum í mótaröðinni verður frestað, þar á meðal einu af fimm risamótum hvers tímabils. Mótin eru: Volvik Founders Cup, Kia Classic og ANA Inspiration-risamótið. Stefnt er að því að leika á mótunum síðar á árinu.
Þá hefur tveimur mótum á Symetra-mótaröðinni verið frestað en Ólafía Þórunn Kristinsdóttir leikur á mótaröðinni og tók þátt á sínu fyrsta móti um síðustu helgi. Mun hún því ekki leika á IOA-mótinu og Casino Resort & Spa mótinu, en þau áttu að fara fram í Kalíforníu.