Fyrsta keppnisdegi Hvaleyrarbikarsins í golfi hefur verið frestað vegna veðurs en til stóð að hefja keppni í dag á Hvaleyrarvelli í Hafnarfirði. Ef veður leyfir verður keppt á morgun, laugardag og á sunnudag. Mótið er hluti af stigamótaröð GSÍ og það fjórða í röðinni en leiknar verða 36 holur á mótinu á tveimur dögum en ekki 54 holur á þremur dögum.
Sterkir kylfingar eru skráðir til leiks á mótinu líkt og Íslandmeistarinn Guðrún Brá Björgvinsdóttir og Ólafía Þórunn Kristinsdóttir í kvennaflokki. Rástímar sem lágu fyrir í dag færast yfir á morgundaginn.
Í karlaflokki eru kylfingar á borð við Axel Bóasson skráður til leiks en hann á titil að verja á mótinu. Ragnhildur Kristinsdóttir á titil að verja í kvennaflokki en hún er einnig skráð til leiks á mótinu í ár.