Kylfingurinn Dagbjartur Sigurbrandsson hjá GR hefur skrifað undir samning hjá Missouri-háskólanum. Þar mun hann spila golf fyrir lið háskólans næstu ár.
Frá þessu er greint á Kylfingi.is
Dagbjartur hittir þar fyrir klúbbfélaga sinn úr GR, Viktor Inga Einarsson, sem hóf nám við skólann á síðasta ári og hefur spilað fyrir golfliðið.
„Það voru um það bil 30 skólar sem höfðu samband við mig svo ég gat svolítið valið milli skóla. Háskólagolfið hefur alltaf verið í huga mér en ég byrjaði að hugsa aðeins meira um það síðasta sumar,“ sagði Dagbjartur í samtali við Kylfing.
Hann bætti því við að sér hefði litist mjög vel á þjálfara liðsins og allar aðstæður. Þá hefði það hjálpað til að Viktor Ingi er í liðinu.
Missouri-skólinn tekur þátt í suðausturhluta 1. deildar, sem er með þeim stærstu og sterkustu í Bandaríkjunum að sögn Dagbjarts.