Patrekur Jóhannesson hefur stýrt danska handboltaliðinu Skjern í síðasta skipti. Þetta kom fram á heimasíðu félagsins í dag.
Áður var gert ráð fyrir að Patrekur léti af störfum hjá Skjern eftir leiktíðina, en Carsten Thygesen, stjórnarformaður félagsins, segir þörf á nýjum manni í brúna.
„Ég ber mikla virðingu fyrir Patreki og hans aðferðum í þjálfun, en það er ekkert leyndarmál að okkur gengur illa. Við þurfum nýjan mann og nýja orku fyrir úrslitakeppnina,“ sagði Thygesen á heimasíðu félagsins.
Claus Hansen tekur við Skjern af Patreki, en liðið er í sjötta sæti dönsku deildarinnar með 21 stig eftir 18 leiki. Undir stjórn Patreks vann Skjern tíu leiki, tapaði sjö og gerði eitt jafntefli.
Patrekur tók við Skjern í kjölfar þess að hann gerði Selfoss að Íslandsmeistara á síðustu leiktíð.
Landsliðsmennirnir Björgvin Páll Gústavsson og Elvar Örn Jónsson leika með Skjern. Björgvin gengur í raðir Hauka eftir tímabilið.