Í dag var lokadagur Landsmóts hestamanna 2018 í Víðidal. Fjöldi manns var viðstaddur í áhorfendabrekkunni til að fylgjast með úrslitakeppnunum en A- og B-flokkarnir þykja gríðarlega sterkir í ár. Í B-flokki gæðinga varð Landmótssigurvegari Frami frá Ketilsstöðum með einkunnina 9,14. Knapi hans og eigandi er Elin Holst. Hún hlaut einnig Gregesen-styttuna, en verðlaunin eru veitt í minningu Ragnars Gregesen, sem var fyrirmynd hestamanna í snyrtilegum klæðaburði og umhirðu hestsins. Styttan veitist þeim knapa sem skarar fram úr í A- eða B-flokki gæðinga og sýnir prúðmannlega reiðmennsku á afburðavel hirtum hesti.
Annar í B-flokki varð Landsmótssigurvegarinn frá 2016, Nökkvi frá Syðra-Skörðugili, og Jakob Svavar Sigurðsson með 9,09 og munaði því örlitlu á þeim efstu.
Lokaatriði Landsmótsins voru A-úrslitin í A-flokki. Helsti munur A- og B-flokks felst í því að í A-flokki er sýnt skeið sem ekki er gert í B-flokki. Sigurvegari varð Hafsteinn frá Vakurstöðum og knapi hans Teitur Árnason. Annar varð Atlas frá Lýsuhóli og knapi hans Jóhann Kristinn Ragnarsson með 8,84.
Einnig voru veitt verðlaun Félags tamningamanna í ár, FT fjöðurin, en þau hlaut í ár Aðalheiður Anna Guðjónsdóttir. Verðlaunin eru veitt þeim knapa sem þykir sýna gott samspil knapa og hests auk þess að sýna útgeislun og jákvæðni í samskiptum.