Tilfinningarnar báru Úrúgvæjann José Giménez ofurliði er hann og félagar töpuðu 2:0 gegn Frakklandi í 8-liða úrslitum heimsmeistaramótsins í Rússlandi fyrr í dag.
Var Giménez svo hnugginn yfir tapinu að hann var byrjaður að gráta áður en leiknum lauk og sást meðal annars hágráta í útsendingu leiksins er hann stóð vaktina í varnarvegg Úrúgvæ þegar Frakkar fengu aukaspyrnu undir lok leiks.
Þessi tilþrif féllu í grýttan jarðveg hjá Gary Neville, fyrrverandi leikmanni Manchester United og enska landsliðsins, sem var að lýsa leiknum fyrir ITV-sjónvarpsstöðina.
„Ég hef ekkert á móti því að sýna tilfinningar og ástríðu en þetta er til háborinnar skammar,“ sagði Neville meðal annars í útsendingunni.