„Markmiðið var að spila hörku varnarleik hér í kvöld,“ sagði Baldur Þór Ragnarsson, þjálfari Tindastóls, í samtali við mbl.is eftir 83:75-sigur liðsins gegn Njarðvík í úrvalsdeild karla í körfuknattleik, Dominos-deildinni, í Ljónagryfjunni í Njarðvík í annarri umferð deildarinnar í gær.
Mikið jafnræði var með liðunum í fyrri hálfleik og var staðan jöfn í hálfleik. Tindastóll vann þriðja leikhluta með 12 stigum og lagði þar með grunninn að góðum sigri Sauðkrækinga, þrátt fyrir að Njarðvíkingar hafi verið nálægt því að jafna metin undir lok fjórða leikhluta.
„Við vildum komast inn í teig, ná í fráköst og mér fannst við gera ágætlega í því. Það skilaði í það minnsta sigri og við höldum Njarðvíkingum í 75 stigum á þeirra heimavelli sem ætti að teljast nokkuð gott,“ sagði Baldur í samtali við mbl.is.