Gamla ljósmyndin: Móhíkanakambur
Setja bókamerki
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
/frimg/1/28/36/1283612.jpg)
Pétur Ingvarsson þáverandi leikmaður Hauka í efstu deild í körfuknattleik vakti nokkra athygli þegar hann mætti á parketið á tíunda áratugnum og skartaði þessum fína móhíkanakambi. Slík klipping var öllu algengari áratug áður eða svo upp úr 1980 þegar pönkið náði fótfestu á Íslandi.
Myndina tók Þorkell Þorkelsson, sem myndaði lengi fyrir Morgunblaðið, í Strandgötunni í Hafnarfirði þar sem Haukar heimaleiki sína á árum áður. Í dag leika Haukar í Ólafssal á Ásvöllum en salurinn er kenndur við Ólaf Rafnsson heitinn sem einmitt lék áður í treyju númer 6 hjá Haukum. Ungir menn vilja greinilega fá áritun hjá Pétri eftir að flautað var til leiksloka og eru hinir ánægðustu.
Pétur var litríkur leikmaður sem fyrst um sinn var í skugganum af bróður sínum Jóni Arnari Ingvarssyni sem var geysilega hæfileikaríkur og sýndi það snemma. Smám saman varð Pétur meira áberandi í deildinni og tímabilið 1994-1995 komst hann í hóp þeirra íslensku leikmanna sem hafa náð að skora 20 stig að meðaltali á einu tímabili í efstu deild. Á því tímabili setti hann persónulegt met í stigaskorun þegar hann skoraði 39 stig í leik á móti Tindastóli sem Haukar unnu 95:82.
Pétur lék með Haukum og Hamri í Hveragerði frá 1989 til 2005 en síðustu árin var hann spilandi þjálfari hjá Hamri. Þar þótti honum takast afar vel upp og var kosinn þjálfari ársins á lokahófi KKÍ árið 2001. Pétur stýrir nú karlaliði Keflavíkur en hefur einnig þjálfað Hauka, Skallagrím og Breiðablik en einnig kvennalið ÍS. Keflavíkur mætir einmitt Breiðabliki í deildinni á fimmtudaginn. Uppeldisfélag Péturs, Haukar, er aftur komið í efstu deild og á fimmtudaginn tekur liðið á móti Hetti.
Fyrir áhugafólk um ættfræði í íþróttalífinu er hægt að tína ýmislegt til. Faðir Péturs og Jón Arnars er Ingvar Jónsson sem gjarnan var kallaður faðir körfuboltans í Hafnarfirði. Sonur Péturs, Hilmar, er atvinnumaður í Þýskalandi og Sigurður sonur Péturs leikur með Keflavík. Hilmar, Sigurður og Kári Jónsson landsliðsmaður eru bræðrasynir.
„Mjög ánægður með útkomuna“
Rímar „engan veginn“ við Veðurstofuna
Fullyrðir að kindurnar beri ekki eftirlitslausar
„Jæja, Jón forseti bara mættur“
3.800 gígawattsstundir af viðbótarorku árlega
„Finn fyrir miklum meðbyr“
/frimg/1/48/83/1488353.jpg)
Hugsaði fyrst um einmanaleika og innilokun