Þýski bankinn Deutsche Bank þarf að afskrifa 257 milljónir evra, 43 milljarða króna, vegna Actavis á fyrsta ársfjórðungi. Þetta kemur fram í uppgjöri bankans sem birt var í morgun. Deutsche Bank afskrifaði 407 milljónir evra, 68 milljarða króna, vegna Actavis á fjórða ársfjórðungi síðasta árs.
Með sölunni á Actavis til Watson hefur bankanum hins vegar tekist að endurheimta mestan hluta þess fjár sem Deutsche Bank lánaði félagi í eigu Björgólfs Thors Björgólfssonar þegar hann keypti Actavis með skuldsettri yfirtöku árið 2007.
Hagnaður Deutsche Bank, sem er stærsti banki Þýskalands, dróst saman um 33% á fyrsta ársfjórðungi og nam hagnaðurinn 1,4 milljörðum evra. Helstu skýringar á samdrættinum eru erfiðar markaðsaðstæður og afskriftir. Er þetta mun verri afkoma en sérfræðingar höfðu spáð en að meðaltali hljóðaði spá þeirra upp á 1,64 milljarða evra hagnað.
Hagnaður fyrir skatta dróst saman um 38% og var 1,879 milljarðar evra.